Na tha kuch to KHuda tha, kuch na hota to KHuda hota
Duboya mujhko hone ne,na hota main to kya hota
Huaa jab GHam se yun behis to Gham kya sar ke katne ka
Na hota gar juda tan se to zaanoon par dhara hota
Huee muddat ke 'GHalib' mar gaya par yaad aata hai
Wo har ek baat pe kehana, ke yoon hota to kya hota

garmi hasrat-e-nakam se jal jate hai
hum chirago ki tarha shaam se jal jate hai

jalna to chirago ka mukadar hai azal se
hum ussi roshni me gumnaam se jal jate hai

jab tera naam aata hai mere naam k sath
jane kion loog mere naam se jal jate hai

bus ki dushwaar hai har kaam ka aasaaN hona
aadmee ko bhee muyassar naheeN insaaN hona

giriya chaahe hai KHaraabee mere kaashaane ki
dar-o-deevaar se Tapke hai bayaabaaN hona

waa-e-deewaangee-e-shauq, ke har dam mujhko
aap jaana udhar aur aap hee hairaaN hona

jalva az_bas ki taqaaza-e-nigah karta hai
jauhar-e-aaina bhee chaahe hai mizhgaaN hona

ishrat-e-qatl_gah-e-'ehl-e-tamanna mat pooch
id-e-nazzaara hai shamsheer ka uriyaaN hona

le gaye KHaak meiN ham daaGH-e-tamanna-e-nishaat
too ho aur aap ba_sad_rang-e-gulistaaN hona

ishrat-e-paara-e-dil, zaKHm-e-tamanna_KHaana
lazzat-e-reesh-e-jigar GHarq-e-namakdaaN hona

kee mere qatl ke baad usne jafa se tauba
haay us zood_pashemaaN ka pashemaaN hona

haif us chaar girah kapDe ki qismat 'GHalib'
jis ki qismat meiN ho aashiq ka girebaaN hona